460 bayan sa 54 na probinsya apektado ng ASF
Kalat na ang African Swine Fever o ASF sa 460 munisipalidad sa 54 na probinsya sa bansa.
Hanggang noong April 3, iniulat ng Bureau of Animal Industry na sa 17 rehiyon ng bansa, tanging ang National Capital Region o NCR lamang ang ASF-Free.
Ayon sa BAI, ang Bangsamoro Autonomous Region for Muslim Mindanao o BARMM ang pinakabagong rehiyon na nadagdag sa mga apektado ng ASF matapos maitala ang unang kaso ng virus sa South Upi, Maguindanao del Sur.
May 20 lalawigan naman ang nananatiling ligtas sa ASF kabilang ang Batanes, Occidental Mindoro, Oriental Mindoro, Palawan, Romblon, Masbate, Aklan, Antique, Bohol, Negros Occidental, Negros Oriental, Siquijor, Biliran, Bukidnon, Misamis Occidental, Basilan, Lanao del Sur, Maguindanao del Norte, Sulu at Tawi-Tawi.
Ang mga lalawigan namang nakikipagbaka para sawatain ang pagkalat ng ASF sa kanilang lugar ang Abra, Benguet, Ifugao, Kalinga, Mountain Province Apayao,Pangasinan, Cagayan, Isabela, Nueva Viscaya, Bataan, Bulacan, Nueva Ecija, Pampanga, Tarlac, Zambales, Aurora, Batangas, Cavite, Laguna, Quezon at Rizal.
Kabilang din ang Marinduque, Camarines Sur, Sorsogon, Capiz, Iloilo, Guimaras, Cebu, Leyte, Northern Samar, Samar, Southern Leyte, Zamboanga del Norte, Zamboanga del Sur, Zamboanga Sibugay, Camiguin, Lanao del Norte, Misamis Oriental, Davao del Norte, Davao del Sur, Davao Oriental, Davao de Oro, Davao
Occidental, North Cotabato, Sultan Kudarat, Sarangani, Agusan del Norte, Agusan del Sur, Surigao del Norte, Surigao del Sur, Dinagat Island at Maguindanao del Sur.
Una rito, sinabi ni Agriculture Assistant Secretary at D-A deputy Spokesman Rex Estoperez na ang ASF ay isa nang national concern at ipinabatid na kay Pangulong Ferdinand Marcos ang lawak ng outbreak.
Sinabi ni Estoperez na sinusunod ng DA ang protocol na ipinaiiral ng World Organization for Animal Health (WOAH) para sa ASF kabilang ang depopulation sa 500-meter radius sa lugar na apektado ng outbreak.
