Laguna Gov. Ramil Hernandez, nagpositibo sa COVID-19
Naka-home quarantine si Laguna Gov. Ramil Hernandez matapos na nagpositibo sa COVID-19.
Inanunsiyo ni Hernandez sa kanyang Facebook account na noong Sabado ay lumabas ang resulta ng kanyang swab test na nagkukumpirma na siya ay nahawahan ng COVID-19.
Ayon sa gobernador, nakararanas siya ng mild na sintomas ng sakit.
Sinabi ni Hernandez na maaaring siya ay nahawa sa kabila ng mga pag-iingat dahil sa hindi maiiwasan sa kanyang trabaho bilang lingkod bayan ang pakikisalamuha sa mga tao araw-araw.
Tiniyak ng opisyal na tuluy-tuloy ang operasyon ng Laguna Provincial Government habang siya ay work from home.
Umaasa si Hernandez na ang nangyari sa kanya ay magsilbing paalala sa lahat na mag-ingat, sumunod sa health at safety protocols, at magpabakuna laban sa COVID-19.
Moira Encina
