Kamara hindi tatalima sa Korte Suprema sakaling ipag-utos ang joint session kaugnay sa Martial Law
Courtesy of Wikipedia.org
Nanindigan si House Speaker Pantaleon Alvarez na hindi susunod ang Kamara sakaling paboran ang mga petisyon laban sa deklarasyon ng Martial Law sa Mindanao.
Ayon kay Alvarez, walang hurisdiksyon ang Korte Suprema sa Kongreso dahil co-equal branches sila.
Sinabi pa ni Alvarez na hindi dapat diktahan ng high tribunal ang Kongreso kung ano ang dapat na gawin kaugnay sa usapin ng Martial Law.
Pupunitin aniya niya ang kopya ng desisyon ng Korte Suprema sakaling kontrahin ang Martial Law declaration, kapag napasakamay niya ito.
Binigyang diin ni Alvarez na posibleng humantong sa constitutional crisis ang sitwasyon sakaling magtuluy tuloy ang panghihimasok ng Korte Suprema sa mga hakbang na ginagawa ng Kongreso kaugnay sa umiiiral na batas militar sa Mindanao.
