Horn, idineklarang panalo ng WBO
Inilabas na ng World Boxing Organization o WBO ang resulta ng isinagawa nilang review o rescoring sa kontrobersiyal na bakbakang Manny Pacquiao at Jeff Horn.
Tatlo sa limang independent judges ang pumabor sa Australian boxer dahilan para pagtibayin ang pagkapanalo ni Horn sa naturang sagupaan.
Ayon sa WBO, nakuha ni Pacquiao ang 3rd, 8th at 9th round ng isandaang porsyento, 80 percent namang naipanalo ni Pacquiao ang 5th round habang 60 percent sa 11th round.
Habang si Horn naman ay isandaang porsiyentong nakuha ang 1st , 6th at 12th round, walumpung porsyentong nangibabaw si Horn sa 2nd, 4th at 7th round habang animnapung porsyento ang napasakamay ni Horn sa 10th round.
Dahil dito, malinaw anila na si Horn ang nanalo dahil limang roundslamang ang nakuha ng pambansang kamao habang ang Australian boxer ay nanalo sa pitong rounds.
Ikinatuwa naman ni Horn ang resulta ng review at sinabi nitong handa siya para sa rematch kay Pacquiao.
Matatandaang ang Games and Amusement Board ang humiling sa WBO para sa naturang review ng laban nina Pacquiao at Horn.
