Mga lider ng PDP-Laban makikipag-dayalogo kay Cong. Alan Peter Cayetano sa usapin ng term sharing
Makikipagdayalogo na ang mga lider ng ruling party na PDP-Laban kay Taguig, Pateros Congressman Alan Peter Cayetano ngayong gabi para pag- usapan ang magiging detalye ng term sharing kay Marinduque Congressman Lord Allan Velasco.
Sinabi ni PDP- Laban President at Senator Aquilino “Koko” Pimentel na dadalo sa meeting sina PDP-Laban Vice-President Aurelio “Dong” Gonzales, Cong. Jhonny Pimentel at si Velasco.
Sinabi ni pimentel na bagamat nais sana nila na si Velasco ang mauna sa term sharing pero dahil naglabas ng guidance ang kanilang chairman na si Pangulong Duterte wala silang magagawa kundi sumunod.
Gayunman, ilalatag aniya nila kay Cayetano na kailangang masunod ang Committee chairmanship at mabibigyan ng puwesto ang kanilang mga senior members.
Kailangan rin aniyang maging maliwanag ang transition at matiyak na bababa si Cayetano pagkatapos ng labinlimang buwan.
Ulat ni Meanne Corvera
