Pagbibigay kay Mary Jane Veloso ng ” clemency o commutation “, dapat pag-aralan ayon sa Senador
Dapat pag- aralan ng Department of Justice (DOJ) ang opsiyon na bigyan ng clemency o commutation ng sentensiya si Mary Jane Veloso ayon kay Senador Jinggoy Estrada makaraang igiit na dapat ituring si Veloso na biktima sa halip na criminal.
Hinimok ni Estrada ang DOJ na ikunsidera ang status ni Veloso bilang biktima ng human trafficking at ng sindikato ng iligal na droga. Dapat aniyang isailalim sa masusing pagrepaso ang kaso ni Veloso.
Pinuri ni Estrada ang Malacañang sa ginawang pagsusumikap para makauwi na sa bansa si Veloso.
Pagpapakita aniya ito ng commitment ng Marcos Administration na pangalagaan ang kapakanan at dignidad ng bawat mamamayang Pilipino lalo na ang mga may kinakaharap na kaso sa ibang bansa.
Para kay Estrada, niloko si Veloso ng mga indibiduwal at sinamantala ang kaniyang kahinaan na ginamit bilang courier ng iligal na droga.
Ang nangyari kay Veloso ay indikasyon na may mahigpit nang pangangailangan para protektahan ang mga Overseas Filipino Workers (OFWs) at palakasin ang mekanismo laban sa human trafficking at illegal recruitments.
Meanne Corvera
