Resolusyon para tutukan ang paggamit ng Intel at confidential funds ng iba’t ibang ahensiya ng gobyerno, lusot na sa Senado
Aprubado na ng Senado ang resolusyon na inihain ni Senador Gringo Honasan para sa pagbuo ng oversight committee na tututok at bubusisi sa paggamit ng intelligence at confidential funds ng ibat-ibang ahensya ng gobyerno
Inihain ni Honasan, Chairman ng National Defense and Security Committee ang resolution kasunod ng mga naganap na pagpapasabog sa Quiapo, Maynila noong Sabado.
Ayon kay Honasan, mahigit limang bilyong piso ang inilalaan para sa intelligence at confidential funds ng ibat-ibang ahensya ng pamahalaan
Dahil dito, mahalaga na matutukan ng mga mambabatas kung maayos bang nagagamit ang nasabing pondo para matiyak ang seguridad at kaligtasan ng bansa at mamamayan laban sa mga grupong naghahasik ng kaguluhan
Kasunod ng pagpapatibay sa resolusyon, itinalaga si Honasan bilang Chairman habang miyembro sina Senador Panfilo Lacson,Richard Gordon, Manny Pacquiao, Bam Aquino at Francis Pangilinan.
Ulat ni: Mean Corvera
